எங்கே பா.ஜ.க ?

தேர்தல் தோல்விக்கு பிறகு எப்படி காங்கிரஸ் கட்சியை மேலும் வளர்க்கலாம் என்று பா.ஜ.க தலைவர்கள் போட்டிப் போட்டுக் கொண்டு செயல்பட ஆரம்பித்துள்ளார்கள். மிகவும் கட்டுப்பாடான கட்சி என்று எல்லோராலும் பாராட்டப்பட்ட கட்சி இன்று பலவீனமான கட்சியாக எல்லோராலும் பார்க்கப்படுகிறது.

தேர்தலில் மக்களை கவர என்ன செய்யலாம் என்று எல்லோரும் யோசித்துக் கொண்டுருக்க, பா.ஜ.க மூத்த தலைவர்களை எப்படி சமாதானம் செய்யலாம் என்று தன் நேரத்தை வீண் செய்தது. பா.ஜ.க. மத்திய தேர்தல் குழு கூட்டத்தை அருண் ஜேட்லி புறக்கணித்தார் உடனே அவரை சமாதானம் செய்ய ராஜ்நாத் சிங், அத்வானி, ஆர்.எஸ்.எஸ். தலைவர்கள் உள்ளிட்டோர் முயற்சி மேற்கொண்டனர். அருண் ஜேட்லியின் கோபம் - சுதன் ஷூ என்பவருக்கு கட்சியில் வட கிழக்கு மாநில கூடுதல் பொறுப்பாளர் என்ற பதவியை அவருக்கு கொடுத்தால்.

அத்வானி பா.ஜ.கவில் இருக்கிறாரா என்ற சந்தேகம் கூட வருகிறது. ஏதோ கட்சி கூட்டத்தில் குத்துவிளக்கு ஏற்றிய பிறகு தன் கடமை முடிந்துவிட்டது என்று எண்ணுகிறார். பா.ஜ.க என்ற முக்கியமான எதிர்கட்சி இன்னும் சில வருடங்களில் இருக்குமா என்று சந்தேகமே கூட வருகிறது.

பாரதிய ஜனதா கட்சியில் கொள்கை குழப்பம் அதிகமாக இருக்கிறது. பாஜக ஆட்சியிலிருந்தபோதிலும் சரி, எதிர்க்கட்சி வரிசையில் அமர்ந்திருந்தபோதிலும் அது ஹிந்துத்வா கொள்கையை ஒழுங்காகக் கடைப்பிடிக்கவில்லை. நாட்டில் எவ்வளவோ வாகனங்கள் விதவிதமாக வந்திருக்க அத்வானி ரதயாத்திரை என்று நேரத்தை வீண் விரயம் செய்கிறார்.

நேற்று தேர்தல் தோல்வியால் ஹிந்துத்வா கொள்கையைக் கைவிடப் போவதில்லை என்கிறார் - ராஜ்நாத் சிங். இந்த அறிவிப்பு என்ன சொல்லுகிறது ? அவர்களுக்கே இப்போழுது சந்தேகம். மேலும் ராமர் கோவிலைக் கட்டும் முடிவிலிருந்து பின்வாங்காது என்று சொல்லுவது போலியான ஹிந்துத்வா கொள்கையாகும். இவர்கள் கோயிலை கட்டவில்லை என்றால் அயோத்தியில் ராமர் பிறக்கவில்லை என்று ஆகிவிடுமா ? நாட்டுக்கு தேவையான எவ்வளவோ விஷயம் இருக்கும் போது, இந்த மாதிரி ஊசிப்போன அறிவிப்புகள் தேவையா என்று பா.ஜ.க யோசிக்க வேண்டும். ராமர் மீது நம்பிக்கை இருந்தால் அந்த இடத்தில் ராமரே கோயில் கட்ட ஏற்பாடு செய்வார். ராமருக்கு ராஜ்நாத் சிங்கும், அத்வானியும் தேவையில்லை. இவர்களுக்கு உண்மையான ஹிந்துத்துவா பற்று இருக்கா ? இல்லவே இல்லை. ஏதோ ஆ.எஸ்.எஸின் மதிப்பை பெற இது மாதிரி ஏதாவது சொல்லிக்கொண்டு இருக்க வேண்டியிருக்கு.

அத்வானி தோல்விக்கு பொறுப்பு ஏற்று ராஜினாமா செய்கிறார், பிறகு மற்றவர்கள் கேட்டுக்கொண்டதற்காக வாபஸ் பெறுகிறார். இதே போல் யஷ்வந்த் சின்ஹா அருண் ஜேட்லிக்கு ராஜ்ய சபா எதிர்கட்சி தலைவர் பொறுப்பு தரப்பட்டதால் ராஜினாமா செய்கிறார். இப்படி தினமும் இவர்கள் தமாஷ் தொடர்கிறது. இது போறாது என்று ஜஸ்வந்த் சிங், யஷ்வந்த் சின்ஹா, அருண் ஜேட்லி கட்சியின் பொறுப்பிலிருந்து ராஜினாமா என்ற கூத்தும் தொடர்கிறது. இந்த கூத்து எல்லாம் முதலில் பத்திரிக்கைகளுக்கு லீக் செய்துவிட்டு தான் இவர்கள் செய்கிறார்கள்.

தேர்தல் தோல்விக்கான காரணங்களை ஆராயப் புறப்பட்டுள்ள இவர்கள், அத்வானிக்கு பிறகு யார் என்ற விடை தேட தான் உண்மையாக புறப்பட்டுள்ளார்கள். எங்கே மோடி வந்து குட்டையை குழப்பிவிடுவார்களோ என்று பயப்பட ஆரம்பித்துவிட்டார்கள். அத்வானி இவை எல்லாம் நடக்காதது போல் பாசாங்கு செய்கிறார். எவ்வளவு நாளைக்கு ?

பா.ஜ.க மூத்த தலைவர்களின் அறிவு எல்லாவற்றையும் சேர்த்தால் கூட ராகுல் காந்தியின் அறிவில் 1% கூட இருக்காது என்று நிருபித்துவிட்டார்கள்.


பலவீனமான பிரதமர் மன்மோகன் சிங் என்று தேர்தலின் போது சொல்லிய அத்வானி அவரை சிட பலவீனமானவர் என்று தற்போது நிருப்பித்துள்ளார். Bharatiya Janata Party - The Party with a Difference என்று அவர்கள் சைட்டில் சொல்லியுள்ளார்கள். எவ்வளாவு உண்மை !