ஆஹா! அவந்தானா நீயி! - இலவசம்

இலவசமாக புகழ்ந்து எழுதிய பதிவு :-)

எல, நீ மூணாப்புதானல படிக்க? அந்தா போவுதான் பாரு. அவன் அஞ்சாப்பு முடிச்சுட்டான் தெரியுமா? அவனைப் பத்தி நீ என்னல நெனக்க? அப்படின்னு கேட்டா அந்தச் சின்னப் பையன் என்ன சொல்லுவான்? அவரு நல்லவரு, வல்லவரு நாலும் தெரிஞ்சவருன்னு சொல்லுவான். அதுவே அந்த அஞ்சாப்புப் பையன் கொஞ்சம் பெரிய கையா இருந்தா இவன் இன்னும் பம்முவான். இட்லிவடையைப் பத்தி நானும் சொல்லணுமுன்னா இப்படித்தான் பம்மணும். இந்த மாதிரி சம்பிரதாயமான பேசறதுக்கு முன்னாடி பழைய பதிவுங்களைப் புரட்டிப் பார்க்கலாமேன்னு போனா என்னென்ன மேட்டர் மாட்டுச்சு தெரியுமா?

• இட்லிவடை பதிவு போட ஆரம்பிச்சது 2003ஆம் வருஷம் அக்டோபர் மாதம். முதல் பதிவு எல்லாம் இட்லிவடை என்ற பெயர் ஏன் என்ற ரேஞ்சில்தான் இருந்தது.
  
• பதிவை சீந்துபவர்கள் கம்மி என்பதால் பல புதிர் விளையாட்டுக்களைத் தொடர்ந்து அளித்து தனக்கென ஒரு கூட்டம் சேர்க்க ஆரம்பித்தார்.
  
• அதற்குப் பின் கொஞ்ச நாள் பின்னூட்ட வெறி தலைக்கேறி பதிவில் பின்னூட்ட விளையாட்டு ஆடத் தொடங்கினார். ஒண்ணுமில்லாத பதிவுக்கெல்லாம் பல நூறு பின்னூட்டங்கள் பெறுவதை ஒரு கலையாகவே செய்தார்.
• சென்ற வார உலகம் என செய்திகளை எடுத்துப் போட்டு பதிவுக் கயமைத்தனம் செய்தார்.
  
• 2003ல் 15 பதிவுகள், 2004ல் 125 பதிவுகள், 2005ல் 62 பதிவுகள் என சராசரிப் பதிவர்கள் எழுதும் அளவுக்கே எழுதி வந்த இட்லிவடையார் 2006 தொடங்கியதில் இருந்து போட்ட பதிவுகள் எண்ணிக்கை கன்னாப்பின்னாவென உயர்ந்து விட்டது. 2006ல் 505 பதிவுகள், 2007ல் 759 பதிவுகள், 2008ல் இதுவரை 624 என சக்கை போடு போட்டுக் கொண்டிருக்கிறார்.
  
• சும்மா இல்லாமல் இனி பதிவுகள் வராது அப்படின்னு ஏப்ரல் பூல் பண்ணுவாரு.

இந்த மாதிரி எல்லாம் படிச்சுப்புட்டு, ஆஹா நீயுந்தானே ஆரம்பிச்ச புதுசுல ஏன் இந்தப் பெயர் அப்படின்னு பதிவைப் போட்ட, அப்புறம் ரீபஸ் அப்படின்னு சொல்லிக்கிட்டு விளையாட்டு செஞ்ச, பின்னூட்ட வெறி ஜாஸ்தி ஆகி ஆடாத ஆட்டமெல்லாம் ஆடுன, புதசெவி அப்படின்னு சொல்லிக்கிட்டு கட் பேஸ்ட் செஞ்சுக்கிட்டு இருக்க, ஏப்ரல் பூல் எல்லாம் கூட செஞ்ச. அதுக்கெல்லாம் மேல நீயுந்தானே 2006லேர்ந்து பதிவு போட ஆரம்பிச்சயேய்யா. அப்போ அவந்தானா நீயின்னு சின்னப்புள்ளத்தனமாக் கேள்வி கேட்டா நான் நான் அளுதுருவேன். அவ்வ்வ்வ்வ்வ்வ்வ்!

ஒண்ணு சொல்லறேன் . அவரு அன்னிக்கே நான் யார்ன்னு தெரிய ரொம்ப நாள் ஆவாதுன்னு பதிவு போட்டாரு. ஆனா இன்னைக்கு வரைக்கும் பார்ட்டி யாருன்னு தெரியாதுன்னு சொல்லி பதிவு போட்டாக்கூட ஹிட் ஆவது. ஆனா என்னியத் தெரிஞ்சவங்க ரொம்ப பேரு இருக்காங்கப்பூ!

இன்னும் ஒரு மேட்டர். இட்லி வடை கவுஜ எல்லாம் எழுதிப் படிச்சு இருக்கேன். ஆனா எனக்குத் தெரிஞ்சு அவரு வெண்பா எல்லாம் எழுதினது இல்லை. அவருக்காக நம்ம வெண்பா ஒண்ணு. இனிமேலாவது நம்புங்கப்பா நான் அவனில்லை!

இன்றோடு அஞ்சாச்சு இட்லிவடை ஆரம்பிச்சு
கொண்டாட வந்தாச்சு கூத்தோட பாட்டாச்சு
வெண்பாதான் போட்டாச்சு வித்தியாசம் தந்தாச்சு
இன்னமுமேன் சந்தேகப் பேச்சு?

டிஸ்கி: என்னதான் ஆரம்பித்த புதிதில் இருந்து கட்பேஸ்ட் டெக்னாலஜியைப் பயன்படுத்தினவருதான்னாலும் இட்லிவடைப் பதிவுகள் வெறும் கட் பேஸ்டா இல்லாம நகைச்சுவை இழையோடும் கருத்துக்களோட வரும். அது மட்டும் இல்லாமல் கட் பேஸ்ட் இல்லாத பதிவுகளும் நிறையா வரும்.

ஆனா இப்போ எல்லாம் அந்த மாதிரி பதிவுகள் வரது ரொம்பக் குறைஞ்சு போச்சு. செய்திகள் கூட சுடச் சுட இருக்கிறது இல்லை. ரொம்ப போர் அடிக்குது. ஒரு வேளை இவ்வளவு பதிவுகள் போடுவதால் கூட தரம் குறையுதோன்னு சந்தேகமா இருக்கு. அதனால எண்ணிக்கை குறைந்தால் கூடப் பரவாயில்லை. நாங்கள் இட்லிவடையை தினத்தந்தி ரேஞ்சில் செய்திகளை முந்தித் தரும் ஆளாப் பார்க்கலை. மீண்டும் அக்மார்க் இட்லிவடைப் பதிவுகளைப் பார்க்க ஆசைப்படுகிறோம் அப்படின்னு சொல்லிக்கிறேன்.

ஐந்து வருடங்கள் தொடர்ந்து எழுதுவது என்பது ஒரு பெரிய விஷயம்தான். அதிலும் ஆயிரக்கணக்கில் பதிவுகள் போட்டு இருப்பது இன்னும் பெரிய விஷயம். எங்க துளசி ரீச்சர் கூட இம்புட்டுப் பதிவு போட்டது இல்லை. இதைச் செய்ததிற்கு இட்லிவடைக்கு என் மனப்பூர்வமான வாழ்த்துகள்!! நன்றி!